Bhram

Meri pavitrata kasauti par

Mera gyaan kasauti par

Main tumhare ghar ki chaukhat se baahar

Mujhko chhoone se tumko shuddhi hawan karane honge

Tum ho samaj chalane wale

Aur main kul samaj ki daasi

Ye kaisa achha bhram hai chalaya

Jisko koi tod na paya

Lekin ab main awaz uthaungi

Apne kaano ko phir se, aadat dalwalo sunne ki

Aur thoda khud ko bhi badalo

Warna aage na badh paoge

Phir na kehna aagaah kiya nahi

Aur tum reh gaye jahan the wahi

Chhodo ye jaat-paat, ling-bhed ka bojh

Milkar kadam badhate hain

Ab ek naye samaj ka chitra banate hain.

Kaisa Dhokha

Tumhara kabza ganga jal par

Aur mere liye kuan bhi nahi!

Tumhare ghar ki aurat devi

Aur mere liye ek dua bhi nahi!

Tum rakhte ho unko bhi dhokhe mein

Rajkumari ka libaas pehanakar

Aur hum par se insani khaal tak utaarkar!

Lekin hum sab jaan chuke hain

Kaise tumne baantaa hai,

Apna rajya chalane ke khatir

Apni baat manvane ke khatir

Ab koi nayi baat nikalo

Ye sab tark purane hain

Karenge bahas barabar se hum

Bahut ho gai manmaani

Ab thoda sambhal bhi jao tum.

Tumhari Ghutan

Lo ye hawa chhoo gai tumko

Jo mujhko chhoo kar aayi thi

Ab kya hoga, kaise rukegi ye hawa

Kaise yahan tum saansein loge

Jahan main bhi saansein leti hoon

Baadal ko tum kaise rokoge

Jo mere yahan se pani lekar

Tum par ja barsa hai

Arre tum to ghut hi jaoge

Ab khud ko kahan tak bachaoge

Tumse nahi maangti main koi aashvasan

Main to khud mein poori hoon

Mere hone mein to shamil hain

dharti, gagan, sitare, bayaar

Tum inse bas bachte rehna

Ye sab mere aangan se hokar jaate hain.

Mera Astitva

Mere astitva par kabza sabka

Mera koi zor nahi

Mujhko jo chaha wo samjha

Kulta, uddhat, paapin

Khud se aankh milaakar dekho

Apne pratibimb se dar jaoge

Meri chhaya se kya darna

Main to bagal se nikal jaungi

Tumko to khud se hai bachna

Zeharila man mastishk tumhara

Tumko hi na das jaye.

Sapno Par Haq

Sapno par mera bhi haq hai

Lekin mere sapne kyun sabse peechhe

Jab jab maine sapno mein rang bharna chaha

Mujhko sada upahaas mila, chheetakashi ki mujhpar,

Mere pair ukhaadne chahe,

Main naari wo bhi nimn jaat

Mera hona na hona samjha

Ab tumko lagta hai mujhse khatara

Jab main apna sheersh uthati hu

Tum kitne kayar aur buzdil

Jhootha mahattva banate ho

Daya a rahi hai tum par

Zara hawa rukh badle to

Kaise seham se jate ho

Ki mukut tumhara jhooth se jadaa

Koi aandhi na uda le jaye

Hum bhi dekhein kab tak tum

Ye jhoothi shaan pehan paate ho

Sapne to hum dekhenge hi

Aur dekhna hai ab tum kya hathiyar apnate ho.