raat

zara yahan bhi rukte hain
kya hoga,
thodi der hi to ho jayegi,
kya hoga zyada se zyada,
bus chhoot jayegi!
samay par laut nahin payenge!
raat ke sukoon ko main 
yahin mehsoos karna chahti hu
ruk kar, chalkar nahin,
raat kaatni nahin, jeeni hai,
kuch pal ke liye hi sahi.
raat to le leti hai khud par ilzam 
kale hone ka,
jurm ko sheh dene ka,
jeevan ke ant ka pratik hone ka
bhoot pishaach jagane ka
phir bhi hai mujhko raat lubhaati
chaand ho jata hai mujhme shamil
chal padta hai mere saath
karke mujhko azad
din ke dhong dikhawon se
dincharya ke niyamon aur ashaaon se
arre dekho! baton baton mein subah ho gai
ao ab sapne se nikalte hain
aur phir se atma chhor sharir mein palte hai.